03.08.2017

Woneem is de gele Stevel?

Wo kann’t angahn?! De lütte Muus will sik antrecken un finnt blots den rechten gelen Stevel. Man woneem is de linke afbleven? Se löppt los un fraagt en Barg Lüüd un Deerten: Hest du mien gelen Stevel sehn?“ Aver överall kriggt se nix anners to hören as: „Ne, heff ik nich.“

Korte Kinnergeschichten mit lütte Biller kann dat gor nich noog geven. Dat lütte Heft (12 x 12 cm) finnt Platz in jeden Büdel un jede Jackentasch. Kinner in'n Kinnergoorn un in de eerste Klass hebbt dor wiss noch jümehrn Spaaß an, man sik dat vörlesen laten un eenfach ankieken köönt dat ok al Jungs un Deerns mit twee.

För de Arbeitskoppel Platt is cool hett Maike Sönksen de Muus-Geschicht opschreven, un Holger Fischer hett dor de Biller to maalt. Bi Platt is cool sitt de Landschaften ut dat Emsland, Ollenborg, Oostfreesland un Schaumborg mit de Landschaftsverbänn ut Lümborg, Ossenbrügge, Staad, Süüd-Neddersassen, un Weser-Hunte mit dat Kultusministerium un de Schoolbehöörd ut Neddersassen an een Disch.

Lüttje Muus. Hrsg. v. Platt is cool. Illustrationen: Holger Fischer. Text: Maike Sönksen. Idee und Konzept: Maike Sönksen, Holger Fischer, Cay-Hendryk Meyer. Gestaltung: Anemone Schulze Herringen. 24 S.

Woneem een dat bestellen kann, steiht bi: www.platt-is-cool.de.