14.08.2018

Wenn de Discher dichten deit

De lütte Band versammelt Gedichten, de de Discher un Buer Heinrich Bartels in Kladden rinschreven hett: op Hooch un op Platt. In bekannte Rhythmen un Riemels singt he vun de Natur, man ok vun de Kohl-un-Pinkel-Tour oder de freewillige Füerwehr Oberneeland-Rockwinkel. Düsse Dichter waagt nich veel, man he verpackt doch sien Denken un Föhlen in Poesie.

Heinrich Bartels (1904-1991) hett in Bremen leevt un arbeidt. He weer dat jüngst vun teihn Kinner, bi sien Vadder is he in de Lehr gahn. Blangen de Alldagsarbeit hett he sien künstlerische Siet nie vergeten. So hett he smeedt, snittjert – un dicht. As he dootbleven weer, hebbt siene Kinner de Heften afschreven, man dat hett noch mehr as 25 Johr duert, dat se en Utwahl as Book rutbröcht hebbt.

In över 60 Johr hett Bartels siene Gedichten to Poppier bröcht. Man de Tieden in dat wille 20. Johrhunnert sünd nich ut de Stücken ruttokennen. Liekers spegelt se de Mentalität vun en Minschenslag, för den Arbeit un Vergnöögt-Ween to dat Leven tohöört, un de weet, woneem he to Huus is.

Heinrich Bartels: Riemels un Vertellen up Platt un up Hoch. ReMa-Verlag. 2017.

ISBN 978-3-946628-11-8