25.07.2018

Wat seggt de Jurist?

Nich all Wöör, de in de Sprakenpolitik bruukt warrt, sünd kloor: So kann een lesen vun „nationale Minderheit“, „Volksgruppe“, „Volk“, „Sprachminderheit“ „ethnische Minderheit“ oder anners wat. Detlev Rein kickt sik nipp un nau an, woneem düsse Wöör in dat düütsche Recht un dat Recht in de Länner bruukt warrt, wat se bedüden doot, wat dat womööglich Ünnerschede gifft. An’t Enn sleit he en Kurs vör, de mehr Kloorheit bringt för all de, de nich blots in Alldagsspraak vun Minnerheiten snacken wüllt.

Detlev Rein weer lange Johren in dat Bunnsbinnenministerium tostännig för dat „Rahmenübereinkommen zum Schutz nationaler Minderheiten“ un de Sprakencharta. He hett mitarbeidt bi en Reeg juristische Hölpsmiddel: Bi den Handkommentar för de Sprakencharta (2011) un ok bi den Kommentar för dat Rahmenübereinkommen (2015/2018.

Mit Fragen vun de Terminologie mööt sik ok de Plattdüütschen befaten: Alleen dat Woort „Regionalsprache“ bruukt de düütsche Dialektologie heel anners as de Sprakenpolitik. Weer goot, wenn ünnerscheedliche Saken ok in ünnerscheedliche Wöör utdrückt warrn kunnen.

Detlev Rein: Nationale Minderheit, Volksgruppe, Volk, Sprachminderheit, ethnische Minderheit oder was? Versuch einer juristischen Begriffsklärung (Kleine Reihe des Sorbischen Instituts Bautzen, 29). Bautzen : Sorbisches Institut 2018, 82 S.

ISBN 978-3-9816961-6-5