16.11.2017

Wat is los in’t Watt?

Wat för Vögels gifft dat in’t Wattenmeer, wo heet se, wo seht se ut, woneem hebbt se jümehr Nest, wat eet se? Dat un noch veel mehr hett Steffen Walentowitz tohoop bröcht in dat Book „42 Vögels van uns Küsten“ oder „42 Fûgels oan ús Kusten“ – dat ganze is nämlich op Westfreesk un ok op Plattdüütsch to lesen, de Spraak is an de ünnerscheedliche Klöör to kennen.

So warrt een wies, dat de Willgoos (de vun uns witte Huusgoos afstammt) mit ehren Partner en Leven lang tosamen blifft, dat de Kollgoos dusende Kilometer ut Noordrussland to uns kummt to överwintern un dat de Sandkiewitt en heel goden Dreih funnen hett, üm Minschen vun sien Nest wegtolocken.

Kloor, dat jedeen vun de 42 Vagels ok op en Bild to sehn is, akkraat un kloor tekent. So kann man jüm ok buten wedder rutkennen. Dat Book is wat för lütte, man ok för grote Lüüd.

Un wokeen noch mehr över dat Wattenmeer weten will, de kann sik en Video bi youtube ankieken: www.youtube.com/watch

Kinner vun de Klass 4a (Grundschool Wallinghausen) verkloort hier, wat dat mit dat Watt op sik hett – en Projekt, dat en ganze Reeg vun Schoolfachen mit’nanner verbinnen deit!

 

Steffen Walentowitz: 42 Fûgels oan ús Kusten / 42 Vögels van uns Küsten. Ljouwert: Afûk 2017, 98 S.

ISBN 978 94 92176 60 8