21.12.2017

Wat heet hier normaal?

Jürgen Kropp vertellt vun allerhand Lüüd, de anners tickt as de Rest, de „ut de Kehr“ sünd. Faken sünd wi Lesers ganz dicht bi so‘n Figur, wi luustert so en Minsch to, wo he mit sik sülvst snackt un wo he sik sien egen Kosmos tohoopschoostert. Un mag ween, wi kriegt mit, dat de een oder anner Idee uns gor nich so frömd is…

En Deel vun düsse Vertellen sünd al fröher mal afdruckt worrn, alleen söss Stück twüschen 1998 un 2015 in dat „Vertell doch mal“-Book. Ok versammelt düsse Band all de Stücken, de in Kropp sien egen Böker „Ut ’n Tritt“ (2007) un „Nix för Frömde“ (1998) binnenstaht. Man jüst de Venedig-Stücken mütt een nu mit anner Ogen lesen – ahn de Biller un all dat grafische Wark ümto. Hier gifft dat Text pur.

Jürgen Kropp wiest uns psychische Afgrünn. De een deper as de anner. Wohrschau also: De as Leser nich ok heel un deel afdreihen will, de schall dat Book blots in lütte Happen lesen.

Jürgen Kropp: Ut de Kehr. Vertellen to’n Smuustern un Gruweln. Hamburg : Quickborn-Verlag 2017, 223 S.

ISBN 978-3-87651-441-3