15.11.2018

Wat en Leven in Wiesmoor!

Sehn kann een in dat Book vele Sieden vun Wiesmoor. Man de dat nipp un nau bekieken deit, de höört dat ok – un nich blots vunwegen de plattdüütschen Texten -, un rüken kann he dat ok. Wiesmoor, dat is veel mehr as dat platte Land. Dat sünd Minschen un dat is en Stück wunnerbore Natur – un beide tohoop maakt dat ut, wo de Minsch „Heimat“ to seggt.

De Fotos hett Susanne Köster-Schoon maakt: Mal still, mal mit veel Puhei un jümmers in klore Klören. Dor gifft dat bannig veel to entdecken. De Geschichten dorto vertellt Ludger Abeln in siene korten Leesstücken to de Biller: Vun Radfohrers, Theaterspelers, en Dudelsackspeler, dat Iescafé, den Maiboom un grote Kunst. De Texten sünd op Hooch, Platt un Engelsch – un so is dat Book ok en Inladung an all de, de vun buten kaamt.

De Lüüd in Wiesmoor warrt sik freien to düt herrliche Billerbook. Man all de annern, de dat Book in de Hand kriegt, de warrt wiss neeschierig op dat Leven in’t Moor in den Landkreis Auerk. Daat is en Book, dor kannsst Du to seggen.

Susanne Köster-Schoon u. Ludger Abeln: Wiesmoor. Ostfriesische AugenBlicke. Wiesmoor : Verlag NACH OBEN OFFEN 2018, 116 S.

ISBN: 978-3-947789-00-9