02.01.2020

Vun’t Segeln

Mit veel Poesie geiht dat hier rin in en Fantasie-Vertellen. Wat aver is Droom, wat is wohr? De lütte Deern geiht op en Segeltörn mit den Käpten. Man woneem is dat Schipp op mal afbleven? Mag ween, dat Maandkind kann helpen. Oder de Waterdeerns?

De Riemeldroomgeschicht hett Viviane Eisold op Hooch opschreven. För de plattdüütsche Version steiht dat Kompetenzzentrum för Nedderdüütschdidaktik in Griepswold in. Dat Slaapleed hett Ulrike Stern in plattdüütsche Wöör sett. De Droombild-Collagen för Kinner vun 3 bet 7 hett Stefanie Dufek maakt. Op de Homepage vun dat Kompetenzzentrum in Griepswold kann een sik de Geschicht anhören.

Dat lütte Book is in Mekelborger Platt schreven. In all de annern plattdüütschen Gegenden mööt de Kinnergoorn-Lüüd woll eerstmal bigahn un sik den Text ümschrieven.

Viviane Eisold, Stefanie Dufek, Viktoria Grünwald: Kumm, wi sägeln! Quickborn-Verlag : Hamburg 2019. ISBN 978-3-87651-468-0