22.07.2020

Vertellen mit en Dreih

Achteran fraagt een sik ja faken mal: Wo büst Du överhaupt in düt Slamassel rinkamen? Un woso besinn ik mi jüst nu op en Saak, de Johrteihnte trüchliggen deit? So geiht dat dat „Ik“ in Harald Maack seine Geschichten. Dat is jümmers en snaaksche Situatschoon, de de Geschicht den Dreih gifft. De Minschen loopt eher so mit – meist as in’t richtige Leven. De Autor nimmt sik Tiet to’n Vertellen, so’n Geschicht löppt över söss oder acht Sieden, geiht also en beten af vun dat „Hör mal“-Format.

Harald Maack is Schauspeler, den de meisten woll vun’t Fernsehn her kennt. Lust an’t Plattschrieven hett he bi „Vertell doch mal“ kregen. Un nu is mit „Üm de Eck keken“ sien eerst Book op Platt op den Markt kamen. Schrieven kann de Mann. Dat hett he al mit “Ich Idiot” Tagebuch einer Weltreise” nawiest.

Harald Maack sien Platt is allerbest to lesen. Wenn he noch en poor mehr Kommas in siene Stücken rinschrieven kunn, harrn de Lesers dat noch eenfacher.

 

Harald Maack: Üm de Eck keken. Hamburg : Quickborn-Verlag 2020, 111 S.

ISBN 978-3-87651-471-0