24.06.2020

Vertell vertell!

Johr för Johr löppt „Vertell doch mal“. Un an’t Enn kann een de besten Geschichten in en Book nalesen. Dat is ok düt Johr so. 26 Sichten op de Welt, mal fründlich, mal snaaksch, mal mit twee Lüüd, mal global, mal mit „normale“ Lüüd, mal mit welk, de ut de Spoor sünd. Wat doch de Fantasie to dat Thema „Fiev för twölf“ so allens tohoopbringt!

Dat sünd de jungen Lüüd, de jungen Froenslüüd, de den Toon angeven doo. Den 1. Pries hett Marie Sophie Koop (23) ut Hamborg kregen: En junge Fro nimmt Kuntakt op to en Autist. Gesche Gloystein (33) ut de Wersermasch schrifft in ehr Vertellen dat tohoop, wat hier un dor op de Welt Minschen wegen Melk in Gang sett. Un denn de Ünner-18-Priesdregersch: Henrikje Anneke Raßmuß (15) ut Jamel, de in Crivitz na School geiht un de nich weniger as den Ünnergang vun de Welt vör Ogen hett.

Mitmaakt hebbt bi ”Vertell doch mal 2020” knapp 1000 Lüüd. Vele schrievt blots för düssen Wettstriet, annern sünd meist Profiautoren. En Thema för 2021 gifft dat noch nich. Man Werner Junge seggt in siene Wöör vörweg to: Tokamen Johr gifft dat wedder en Fest in’t Ohnsorg-Theater.

 

Vertell doch mal! Fiev vör twölf. 26 plattdeutsche Geschichten. Hrsg. vom Norddeutschen Rundfunk, Landesfunkhaus Schleswig-Holstein mit freundlicher Unterstützung von Radio Bremen, dem Ohnsorg-Theater und der PNE AG. Husum Druck- und Verlagsgesellschaft : Husum 2020, 132 S.

ISBN 978-3-96717-004-7