23.10.2019

Ut’n Siuerlanne

Dat Suerland liggst an de süüdliche Kant vun dat plattdüütsche Land. Vun junge Lüüd kann een dor meist gor keen Platt mehr hören. Dat Wöörbook, dat Reinhard Pilkmann-Pohl 1988 rutgeven harr, is al lang vun’n Markt. Nu hett de Heimatbund ut’t Suerland en nee Oplaag maakt. De versammelt en ganze Reeg nee Wöör, un de sünd root druckt.

Utweert hebbt se en Barg Literatur – dat gifft op jeden Fall mehr Wöör. Opnahmen hett de Rutgever Werner Beckmann nu aver ok Flexionsformen: dor steiht nich allens bi blieben oder bloiwen, man dor finnt sik ok blibbe, bliff un annern. Opföhrt sünd ok Wöör, de bi’t Snacken tohooprutscht, as iutem för iut dem / äinem oder makernd för makern et - ­ machten es.

Dat is nich jümmers kloor, wat de velen Varianten op de Utspraak oder op de Schrievwies trüchgaht. Op jeden Fall is dat goot, dat ut dat Wöörbook vun 1988 de dialektgeograafsche Deel övernahmen worrn is. Eerst wenn een dat leest hett, kriggt een en Indruck dorvun, woans dat mit de ünnerscheedlichen Vokale utsüht. Leider is bi’t Inscannen de ole Siet 12 vergeten worrn.

Sauerländer Platt. Ein Wörterbuch. So kuirt de Sauerlänner, bearb. von Reinhard Pilkmann-Pohl (alte Fassung) und Werner Beckmann (neue Fassung). Hrsg. v. Sauerländer Heimatbund. Schmallenberg : Woll-Verlag 2019, 592 S.

ISBN 978-3-943681-99-4