15.07.2020

Un wi in siene Hannen

In de Johren 2001 bet 2018 hett Paster Walter Scheller 74 Andachten för de Rundfunk-Reeg „Dat kannst mi glöven“ schreven. De kann een nu Stück för Stück nalesen, op Hooch un op Platt.

Mit siene korten Stücken sett Scheller Gedanken in Gang. Düsse Na-Gedanken kaamt den Tohörer oder den Leser, wenn he anfangt, över dat Stück natodenken. Lütte Geschichten sünd dat, de jümehr Funken haalt ut dat Leven, ut Literatur un ok ut de Bibel. Dor stickt keen missionaarschen Iever achter – dor hett eenfach en Minsch nipp un nau hinkeken un tohöört. Un wat he dorvun mitnimmt, dat verpackt he in en kloke Geschicht, de nich länger duert as 150 Sekunnen.

Walter Scheller weet wiss, dat Lüüd em geern tohöört un dat dat för vele Minschen stuur is, op Platt to lesen. För Lüüd, de unseker sünd, hett he den hoochdüütschen Text dortosett. De Vergliek lohnt sik.

 

Walter Scheller: … und wir in Seinen Händen. Radio-Andachten plattdeutsch und hochdeutsch. Hermannsburg : Ludwig-Harms-Haus 2019, 277 S.

ISBN 978-3-937301-93-8