01.03.2018

Twüschen Froenparkplatz un Dörpflohmarkt

Wokeen weten will, wat dat nu genau is: Alldag in Noorddüütschland – de mütt sik blots Renate Kiekebusch ehre Geschichten dörlesen. Dütmal steiht nich Düdenbüttel bavenan, man dat geiht üm de beste Fründin – de, de een so goot versteiht un de een allens vertellen deit.

Kinner, Reisen un dat Leven mit de Naverslüüd: dat is de Horizont för Renate Kiekebusch ehr Geschichten. Vertellt vun een, de Bescheed weet, wat löppt un woans de Welt sik dreiht. Se lett geern de Figuren snacken, boot faken Dialogen in. Un se nimmt sik sülvst nich so eernst: „Technik is nich miene Sook!“

All Geschichten vertellt Renate Kiekebusch lebennig un so, dat een wiss geern tohören mag. Ehr Platt is teemlich dicht bi dat Hoochdüütsche, man ok dat is vundaag woll normal.

Renate Kiekebusch: Beste Fründinnen. Geschichten vun Elke un mi. Bremen : Edition Temmen 2018, 96 S.

ISBN: 978-3-8378-7051-0