08.10.2018

To’n Mitsingen

Teihn frische Kinnerleder bringt düt Book: De Texten sünd mit Noten afdruckt, un to’n Anhören gifft dat allens ok op CD. Bunt, plietsch un ut de Kinnerwelt vun nu, mal rockig, mal bluesig, un mal kannst ok en Schlager ruthören. Wat op’n Speelplatz los is, besingt „Ohauerha“, „Hein Daddel“ is en Jung, bi den böös veel scheef löppt, un „Klaus Kleckerklümp“ is en opsternaatschenen Keerl, de egalweg Krawall maakt.

Wiebke Colmorgen is in Schleswig-Holsteen mit Hooch un Platt opwussen. Se höört to de Kru vun de plattdüütschen Narichten in Hamborg mit to. De Leder hett se schreven för Kinner, Öllern un Grootöllern – eendoont, wat se nu Platt mitbringt oder nich. Un so gifft dat jeedeen Text ok op Hooch.

De Musik hett Hardy Kayser schreven. De bunten Biller hett Tanja Esch maalt. Op de CD köönt wi Wiebke Colmorgen un Hardy Kayser hören. As Kinner singt mit: Clara Kayser, Matilda Meuser un Anton Zurholt.

Wiebke Colmorgen (Texte) und Hardy Kayser (Musik): Plattkinner. Neue plattdeutsche Songs für Hamburg und den Norden, mit Bildern von Tanja Esch. Hamburg: Junius 2018, 48 S., 1 CD.

ISBN 978-3-96060-501-0