24.04.2019

To’n 200.

En plattdüütsche „Geisterbeschwörung“ – so nöömt Holger Janssen sien Hörspeel üm de beiden groten Schrieverslüüd Klaus Groth un Fritz Reuter. Beide Geister sünd inlaadt, över sik, jümehr Leven un Schrieven to vertellen. Man wokeen is egentlich de Ehrengast? Nee, lieden möögt se sik nich, to ünnerscheedlich is dat, wat jüm wichtig is. Man an’t End köönt se sik doch verdregen – bi en Glas Rootwien oder dree.

An’n 24. April is dat 200 Johr her, dat Klaus Groth in Heid op de Welt kamen is. Dorüm hebbt Radio Bremen un de NDR dat Höörspeel ut dat Johr 2010 nu op en CD pressen laten un bi Tennemann op den Markt bröcht. Kloor is: Reuter un Groth hebbt sik nie drapen. Toeerst literarisch tohoopbröcht hett jüm Heiner Egge in sien Romaan „In der Kajüte“. Un nu schickt Holgen Janssen jüm in en Höörspeelstudio.

Uwe-Detlev Jessen, he is jüst in’n Januar-Maand dootbleven, gifft Reuter sien Stimm, Joachim Bliese deit dat för Klaus Groth. Dat CD-Book hett Rainer Schobeß schreven.

 

Holger Janssen: De Ehrengäst, eine plattdeutsche Geisterbeschwörung. Schwerin : Tennemann 2019, Speeltiet: 53:16.

ISBN 978-3-941452-68-8

LC 02143

LVC 3002192