08.05.2019

Tohuus

Se is Botschafterin för dat plattdüütsche Theaterspeel – nu hett Sabine Kaack en Sammlung mit Geschichten un Gedichten rutgeven. De meisten vun de 22 Schrieverslüüd sünd ut Schleswig-Holsteen. En ganz poor ole sünd dorbi, as Groth, Storm, Meyer un Fehrs, man de meisten sünd ut uns Tiet: Bull, Heise-Batt, Kropp. Se vertellt vun dat, wat dat Leven in’n Noorden so utmaken deit – vör allen aver vun de Minschen.

Mal mehr literarisch, mal mehr volkstümlich – as bi Burlala; oder bi de twee Leder vun Godewind. De Sammlung wiest vele Klören vun de plattdüütsche Literatur. Dor warrt wiss jeedeen Leser för sik wat in finnen. Sorteert sünd de Stücken na den Naam vun de Schrievers.

Un af un an kannst di ok wunnern. Wo klook is doch de eerste Satz vun en Prosa-Stück Waltrud Bruhn, de wi anners blots as deepdenkern Poetin kennt?: „Wat glöövst, wo lang en dat in Dösigkeit utholen kann un dar gar nich en beten bi ut’e Puust kamen kann?“

 

Sabine Kaack: Dor bün ik tohuus. Geschichten und Gedichten ut mien Heimat. Hamburg : Quickborn 2019, 127 S.

ISBN 978-3-87651-456-7