08.11.2017

So as jümmers

Gifft to’n Glück Saken in de Welt, op de kannst di verlaten. Un dor höört de „Voß un Haas“-Klenner mit to. Jüst is de Johrgang 2018 vör Tüüch kamen. Vörn dat Kalendarium, denn Geschichtliches, Literarisches un an’t Enn noch wat För de Gören.

In Hartmut Brun sien Utwahl kannst di al 2017 in fastlesen. Maand för Maand gifft’t en Gedicht vun Dieter Niebuhr, dorto Buernregeln un „mutmaßliche Witterung“. Un jeedeen Klennerdag is ok en Johrsdag vun een, de in de plattdüütsche Kultur en Rull speelt. Wieder achtern finnt sik Geschichten un Gedichten, so vun Hannelore Hinz, Ursula Kurz, Wolfgang Mahnke, Wolfgang Kniep oder Jürgen Pump.

De meisten Schrieverslüüd sünd ut Mekelnborg un Vörpommern, man de een oder anner ut den Westen is dor ok mit bi. Vele Stücken sünd op Platt, man denn kümmt ok wat op Hooch. So as dat herrliche lütte Kunstwark vun Hartig Suhrbier över dat, wat in de schöne Literatur so allens över Paster Jobst Sackmann to finnen is. Schall mi mal verlangen, woans dat Wedder in’n Februar warrt, wo dor doch to lesen steiht: „Er fängt trüb an, dann wird der 4. ein lustiger Tag. Danach ist es wieder unlustig.“

 

Voß un Haas. Norddeutscher Heimatkalender 2018. Rostock : Hinstorff 2017, 121 S.

ISBN 978-3-356-02094-6