26.03.2019

Snaaksche lüttje Krimis

Joke Bruns un Harm Janßen passt to Oostfreesland as man wat. Se arbeidt op de Warft in Oldersum, snackt Platt un hebbt een Laster: Wenn se wat seht, wat nich fasttüdelt is, denn övernehmt se dat. Dor kann de Polizei nich över lachen, de Lüüd, de dat tohören deit, ok nich, un de echten Ganoven al lang nich.

Wat Lübbert R. Haneborger mit Humor un Plie un Mallbüdeleen op de Been kriggt, dat kann sik sehn laten. Vertellt sünd de Krimigeschichten op Hooch, man de Dialogen sünd Platt. Dat heet: Lesen kann een de ok op Hooch, denn druckt sünd de Snack-Passagen in twee Spalten.

Na den eersten Band vun Joke & Harm is in Oldersum fix wat in Gang kamen; mitspeelt hebbt ok Lüüd as Siemen Rühaak un Felix Vörtler. Un ok de Lüüd in Oldersum hebbt dor en Barg Spaaß an hatt. Dat kann nu wiedergahn, mit de verdreihten Geschichten ut den 2. Band.

 

Lübbert R. Haneborger: Echte Oldersumer II: Die diebischen Werftarbeiter Joke & Harm sind nicht zu fassen. Sieben neue Krimigrotesken aus Ostfriesland. Edition Klamm & Heimlich. Norderstedt : Books on Demand 2018, 133 S.

ISBN: 978-3-748-16567-5