27.11.2019

Schenken oder nix schenken

Plattdüütsche Geschichten to Wiehnachten – de een hett en Packen Kopien op’n Dutt, de anner en Reeg Böker mit Zedels binnen. Un wenn dat dor op ankümmt, kann een de een Geschicht, de een jüst söken deit, doch nich finnen. Wat goot, dat Gesche Scheller wedder en Book mit 37 Geschichten un Gedichten vun 18 Schrieverslüüd tohoopstellt hett.

Klassikers sünd dorbi as Rudl Kinau sien brunen Schimmel. För Hilda Kühl is Wiehnachten de stille Tiet, Hans-Jürgen Forster sorgt sik üm Traditschoon, Gerd Spiekermann söcht na dat rechte Geschenk un Reimer Bull weet, wat achter den Satz stickt: Wi schenkt uns nix. Alldag – Lengen – Kinnertiet – Gloven, vun allens un för jeedeen is dor wat mit bi.

Un dor passt ok allerbest Waltrud Bruhn mit in’t Bild. Wi kennt ehr meist blots as Lyrikerin, man hier vertellt se vun de Wiehnachtskrüff – dat is grote Spraakkunst. Gifft to’n Glück överall noch wat Nee’s to entdecken.

Gesche Scheller (Hrsg.): Schöne Wiehnachten. Geschichten to Advent, Wiehnachten un Sylvester. Hamburg : Quickborn-Verlag 2019, 119 S.

ISBN 978-3-87651-459-8