29.03.2018

Poppenspeel

Vör een Johr is dat Book „Dag ok …“ rutkamen – nu levert Werner Momsen ok de Höörstücken dorto af. 31 teemlich plietsche Alldags-Geschichten vertellt de Handpopp mit de witte Plüüschhuut un de Kassenbrill, faken ok noch utstaffeert mit sien Schippermütz un de brune West.

De Idee is: So’n Popp kann ganz anner Saken vertellen as en eenfachen Minsch. Un denn mengeleert sik dor all de Biller mit rin, de wi vun den Alldag un vör allen ok vun de kommodige plattdüütsche Spraak hebbt. Ünner’n Streek kümmt dor en verdreihte, aver fründliche Welt vör Dag.

Werner Momsen snackt hier blots Platt. Man ünnerwegens is he ok veel mit sien noorddüütschen Missingsch-Snack. De Lüüd möögt dat. Siene plattdüütschen Vertellen bi „Hör mol en beten to“ sünd al lang Kult. Ok dat möögt de Lüüd.

Werner Momsen: Dag ok… CD. Quickborn-Verlag 2018.

ISBN: 978-3-87651-424-6