24.01.2018

Platt küern

Överall in Noorddüütschland entwickelt Lüüd ut de Schoolpraxis opstunns Materialien för Plattdüütsch in de School. Ok in Westfalen. Wat Studenten för en Uni-Kurs tohoopstellt hebbt, dat is nu in düsse Sammlung för 31 Schoolstünnen trechtmaakt worrn.

De Lehrplaan in NRW kennt för Platt keen systematischen Spraakkurs, bi den at een op dat anner opboot. Vun dorher kann jeedeen Stünn för sik stahn. De Stünnen höört to de Themenfelder „Mensch und Gemeinschaft“, „Zeit und Kultur“, „Natur und Leben“, „Verkehr, Technik und Arbeitswelt“ un „Niederdeutsche Alltagsschriftlichkeit“ to, de in de drüdde un veerte Klass an de Reeg sünd. Dor sünd ok allerhand Kopier-Vörlagen mit bi – fraagt sik blots, wat dat Book dat Koperen ok uthöllt.

Würklich goot is dat, wat hier an didaktische un methodische Henwiesen to lesen is. För den Ünnerricht sülvst steiht dat Schrieven un Lesen teemlich wiet bavenan. Dat is in anner Bunnslänner nich so – dor geiht dat mehr üm „Sprechanlässe“. Vunwegen den nich-systematischen Ansatz mutt fehlen: Wat schall dorbi rutkamen, na 6 oder 12 oder 24 Maand Plattdüütsch-Ünnerricht?

Hans-Joachim Jürgens und Helmut H. Spiekermann: Niederdeutsch in der Grundschule. Unterrichtsmaterialien für die 3./4. Klasse an Grundschulen im Münsterland. Wissenschaftliche Schriften der WWU Münster. Münsterscher Verlag für Wissenschaft 2017, 373 S.

ISBN 978-3-8405-0160-9