21.09.2017

Platt in de drüdde Klass

De Snack „Dat gifft ja keen Book för den Plattdüütsch-Ünnerricht in de Grundscholen“ gellt al lang nich mehr. För de drüdde Klass hett Edith Sassen nu en Spraakkurs mit söven Lexen vörleggt: Begröten, Tahlen, Farven – School – Deerten – Mien Lief – Familie – Tüüch – Eten un Drinken, Fröhstück.

Goot för de Schoolmesters un de Schölers is, dat de enkelten Lexen na een un desülvige Oort opboot sünd: 1. To dat Thema gifft dat Koorten mit Biller un Wöör op; de kann een sik ok jümmers mal wedder vörnehmen. Dorto gifft dat faken en Leed. – 2. Dialogen. – 3. En lütte Geschicht mit Wöör un mit Biller vertellen. – 4. Lütte Speelstücken. – 5. En Wöörbook.

An de velen lütten Stücken to’n Öven, ok mit Anmalen un Inkringeln, kann een marken, dat sik Edith Sassen allerbest mit dat Lehren vun Spraken utkennen deit. So is dat ok keen Wunner, dat se ok för de Lannsschoolbehöörd in Neddersassen as Beradersch in’t Emsland un in de Grafschup Bentheim ünnerwegens is.

Dor stickt en Barg binnen in düt DIN-A-4-Book. Man de Verlag harr sik mehr Möög geven kunnt bi den Opboo vun de Sieden un vör allen bi de Biller – dat süht doch böös na „sülvst maalt un tekent“ ut. Un wenn een sik de Schrievwies ankieken deit, denn is dat Book leider blots in dat westlichste Neddersassen to bruken. Un dat is würklich schaad.

Edith Sassen: Platt löppt. Für Einsteiger. Isensee Verlag : OIdenburg 2017, 61 S. ISBN 978-3-7308-1355-3