07.06.2018

Pablo fiert Geboortsdag

En Kinnerbook in twee Spraken: Pablo hett Geboortsdag, Tom hett ok al en Geschenk – man he hett keen Inladung. Kann he dor nu eenfach hengahn? Dat geiht üm Spelen, Fiern, Fründschaft. Mit dorbi sünd Kinner ut Australien, Düütschland, England, Frankriek, Italien, Russland, Syrien un de Törkei.

Toeerst opschreven hett de Geschicht Arzu Gürz Abay. De Biller hett Amrei Fiedler bistüert, in fründliche Kinnerklören. Op de Biller is jümmers veel to entdecken – bi’t Ankieken kann een noch de een oder anner Geschicht mehr vertellem.

Dat Book gifft dat in twee Spraken: Hier in Düütsch un Platt, man ok in Arabisch, Engelsch, Franzöösch, Italiensch, Russisch, Spaansch un Törksch. Den plattdüütschen Text hett Wiebke Colmorgen översett. Hier un dor blifft he en beten dicht bi dat Hoochdüütsche, vun de plattdüütsche Idiomatik harr een sik en Spier mehr wünschen kunnt.

Arzu Gürz Abay (Text) / Amrei Fiedler (Illustration): Pablos Piñata. Übersetzung ins Plattdeutsche: Wiebke Colmorgen. Amiguitos : Hamburg 2018.

ISBN 978-3-943079-70-8