14.11.2018

Op Latiensch un ok op Platt

En Klenner mit latiensche Spröök – ja, dat gifft Lüüd, de sik so wat geern an de Wand hangt. Man wenn mehr Spraken mitspeelt, wenn een verglieken kann un sik mitnehmen laten kann in en anner Kultur, denn süht dat al wat anners ut. Bi den „Latein Klender 2019 / MMIXX“ is dat eerste Mal nu ok Plattdüütsch mit bi.

Vörweg steiht en Satz vun Publilius Syrus, de in’t 1. Johrhunnert vör Christus leevt hett. Dorto gifft dat denn en düütsche Version un dorto Engelsch, Franzöösch, Italiensch, Spaansch, Nedderlannsch, Sweedsch, Finnisch un Greeksch, Platt, Schwäbisch, Bairisch, Sächsisch un Schwyzerdütsch. Also: Gravissimum est imperium consuetudinis – Gewohnheit ist die drückendste Tyrannei – Jümmers desülvige Trott, dat maakt di dat Leven rott.

Schaad is man blots, dat de Rutgever Plattdüütsch as „Dialekt“ behannelt. Man dat hangt woll ok mit den Weert vun de Spraken tohoop. Mag ween, dat duert bi Altphilologen wat länger, dat se Platt as egen Spraak ankieken köönt.

Latein Kalender 2019 / MMIXX. Internatsgymnasium Pädagogium Bad Sachsa im Harz. www.lateinkalender.de