26.10.2017

Op den Weg kummt dat an

De Grashüpper, de Botterlicker un de Snick gaht op Tuur. Wat se op jümehr Reis allens beleven doot, dat kann een sik ankieken in dat neeste Kinnerbook vun Heidrun Schlieker. Dorto gifft dat en lütte Geschicht, de een lesen – oder beter noch: vörlesen kann.

Söken doot de dree Frünnen Bollerbüttel, denn dor schall allens veel beter ween. Wat se Bollerbüttel woll finnt? De Deerten mit den groten Ogen – dat sünd de, de Heidrun Schlieker maalt hett, jümmers mit Saft un Kraft in de Klören. Rechts op en Duppelsiet is jümmers dat Bild, links steiht de Text. De is för Kinner vun een bet veer, un mit sein Rhythmus kann een den goot lesen.

To dat Book gifft dat glieks ok en „methodisch-didaktische Handreichung“. Dor köönt sik Lüüd, de in den Kinnergoorn oder in de Grundschool mit dat Book arbeiten wüllt, Ideen afholen: To’n Basteln, Malen, Geschichten-Vertellen, Riemeln, man ok över de Deerten in de Natur.

 

Heidrun Schlieker: Snack, Snick un Botterlick oder De Reis na Bollerbüttel. En Billerbook op Plattdüütsch för lütte un grote Lüüd. Lüneburg : Plaggenhauer 2017, 44 S.

ISBN 978-3-937949-21-5

Heidrun Schlieker: Methodisch-didaktische Handreichungen in Platt- und Hochdeutsch zum Bilderbuch „Snack, Snick un Botterlick“. Lüneburg : Plaggenhauer 2017, 160 S.

ISBN 978-3-937949-22-2