09.06.2020

Ollenborger Mönsterland vun aal bet Zylinnerputzer

Na teihn Johr liggt de ne’e Oplaag vun dat Wöörbook vun’t Ollenborger Mönsterland op’n Disch – en Book, dat sik sehn laten kann. Ut 13.000 Wöör in dat “Wörbauk” sünd mehr as 20.500 worrn. Opnahmen sünd ok Formen, de nich normal flektierten sünd, Schrievwies un Utspaak bringt mit sik, dat nich blots töwen, man ok töff, töww un teuw opföhrt sünd. Dat hett den Vördeel, dat een jeedeen Woort, dat een lesen (oder hören) deit, ok finnen kann.

Hier staht de Wöör ut uns Tiet binnen. Bi Lokaal staht ok -radio, -reporter, -siete un -zeitung. Jüst so höört dat to den Alldag, dat Minschen ümschaulen mööt. Alleen an Stüern sünd opföhrt Karken-, Lohn-, Mehrwert- un Ümsatzstüer. Man ok de Landschaft kümmt to ehr Recht: Dat gifft 23 Wöör mit Törf- vörn an’n Kopp. Un denn speelt för dat Leven un för de Spraak de kathoolsche Horizont en grote Rull: An’n Sünn- un Fierdag hett de Minsch nich eenfach sien Schapptüüch an, nee, hier heet dat Karksönndaogshohmisstüg.

Goot, dat dor vele Johren lang en Arbeitskoppel mit en Bült Verstand un Ünsicht tohoopseten hett – een Minsch alleen harr dat nich raken kunnt. Töven dröfft wi nu op dat hooch-plattdüütsche Wöörbook un dat Wöörbook to’n Anhören. Kloor aver is nu al: Düt Wöörbook is mit sien Opboo un Druckbild en Vörbild för all de regionale Wöörböker överall in Noorddüütschland.

 

Plattdeutsches Wörterbuch für das Oldenburger Münsterland. Red.: Maria Blömer, Bernhard Grieshop, Alfred Kuhlmann, Wilhelm Thien, Kerstim Ummen; wissenschaftliche Begleitung: Wilfried Kürschner. Hrsg. vom Heimatbund für das Oldenburgische Münsterland, Cloppenburg, 2020, 555 S.

ISBN 978-3-941073-29-6