13.09.2017

Ole Leed in nee'e Kleed

"... Vadder slöppt, Mudder slöppt, ik slaap alleen." - Düt ole Volksleed vun en junge Deern, de op ehren Leefsten luert, kennt meist jeedeen un hett de Melodie in't Ohr. Dat dat Leed allerbest in uns Tiet passt, wiest en CD-Projekt ut Mäkelborg-Vörpommern.

14 Bands ut't Land hebbt dat ole Volksleed nee utleggt un op jümehr Oort un Wies nee un frisch maakt. Dat geiht vun Rock un Pop över Electro un HipHop bet hen na Salsa un Funk. Dat Leed rutkennen kann een jümmers: Mal is dat de Melodie, mal de Text. De een singt dat Stück op Engelsch, de anner op Hoochdüütsch. Een Band klamüüstert en ganz nee'en Text ut, en anner vermengeleert Stücken ut den Text mit jümehr egen Text.

De CD schall in den Plattdüütschünnerricht an de School bruukt warrn. Snackt warrn kann to'n Bispeel över de Rull vun Mann un Fro, över Jugendkultur, doröver, wat för en Musik een geern mag, över Fründschop, Familie un de Leevde. Man ok in den Musikünnerricht kann de CD goot insett warrn.

Op den Weg bröcht hebbt de CD de PopKW Landesverband für populäre Musik und Kreativwirtschaft Mecklenburg-Vorpommern e.V., de Stiftung Mecklenburg un de Heimatverband Mecklenburg-Vorpommern e.V.

Mehr to weten kriegen över den CD-Sampler "Dat du mien Leefsten büst" kann een ünner: http://www.popkw.de/sampler/