30.11.2017

Över Gott un de Welt

Siet mehr as 60 Johr gifft dat nu de plattdüütschen Andachten in Neddersassen in’t Radio. De Pastorin Anita Christians-Albrecht hett Texten dorvun nu för en Book tohoopstellt. Na „Dat kannst mi glöven! Plattdeutsche Radioandachten aus zwei Jahrzehnten“ vun 2015 is düt al dat twete.

In „leichter Sprache“ – also klor un düütlich – warrt hier Stücken ut de Bibel, Gedanken un Möten mit Gott vertellt. In de Wöör vörweg steiht to lesen, wat de Andachten in’t Radio utmaken deit. Opdeelt sünd de 151 Höör- un Leesstücken vun 54 Theologen op dree Stremel: 1. Dör dat Karkenjohr, 2. Minschen ut de Bibel, 3. Van Gott vertellen.

För vele Minschen kann düt Book in’t Johr 2018 en goden Fründ warrn.

 

Anita Christians-Albrecht: Zuspruch aus dem Aether. Plattdeutsche Radioandachten als Beispiele konkreter Verkündigung (Dialekt und Religion / Religion und Dialekt Bd. 6). Berlin : LIT Verlag 2017, 196 S.