13.08.2018

NRW snackt

Wat snackt de Minschen in de Region, wenn se nich hooch snackt? In en Land as Nordrhein-Westfalen is dat gor nich so licht to. Un vör allen dor, wo Platt weniger un weniger warrt, hett een ok bald nich mehr den Klang in’t Ohr. Düsse CD dokumenteert 2 Stünnen lang in 44 Opnahmen westfäälsch Platt, Nedderfränkisch un Ripuarisch.

De 44 Texten sünd to‘n Deel in de 1950er Johren opnahmen worrn, en poor sünd ut de 1990er Johren, de annern sünd frisch. Op düsse Oort kann een sik nich blots in de Regionen rinhören, nee, een kann ok mitkriegen, wat sik in twee Generatschonen ännert hett: Wo fröher dat ole Dörpsplatt to hören weer, gifft dat nu mehr överregionale Formen.

Ok wenn dat Land NRW Plattdüütsch al vör 20 Johr bi de Europäische Charta för Regional- un Minnerheitenspraken anmellt hett, blifft Platt för de Rutgevers Georg Cornelissen un Markus Denkler en Dialekt. Anners harrn se sik womööglich nich op dat reine Dokumenteren trüchtrecken kunnt.

Die Dialekte von Nordrhein-Westfalen. 44 Sprachaufnahmen aus dem 20. und 21. Jahrhundert. Hrsg. im Auftrag der Landschaftsverbände Rheinland und Westfalen-Lippe von Georg Cornelissen und Markus Denkler. 2018.

ISBN 978-3-939974-65-9