12.03.2018

Nee’e Rullen för Hooch un Platt

Wi leevt in en Tiet, in de de Spraken in Europa un de Welt to en nee’e Oort vun Tosamenspeel finnt. Düütsch verleert mehr un mehr sien Rull as Wetenschapps-Spraak. Un Platt is op den Weg hen na en Standard. Wat för Faktoren dor all mitspeelt, vör allen aver, dat dat Ansehn en gewaltige Rull speelt, dat wiest Dieter Stellmacher in düt lütte Book.

Lüüd ut de Weertschapp un Forschung tuuscht sik rund üm den Globus ut, un meistens doot se dat op Engelsch. Wat aver heet dat för de Tokunft för de hoochdüütsche Spraak. Warrt de – vun de Funkschoon her – mehr un mehr to en Dialekt?

Op de anner Siet is Platt op den Weg to sowat as Standard. Fröher hebbt de Lüüd över „Funkplatt“ schimpt – man wenn Platt in den Schoolünnerricht sien Platz finnen schall, denn rückt allens dat an de Kant, wat typisch is för blots en Dörp oder en Gegend. De Schölers mööt weten, wat as richtig gellt un wat as verkehrt: Schrievwies, Adjektiv-Endungen oder Plural-Bildung bi de Substantive.

Dieter Stellmacher weer 1976 bet 2005 Perfesser för Nedderdüütsche Philologie an de Universität Göttingen.

Dieter Stellmacher: Die niederdeutsche Sprachgeschichte und das Deutsch von heute. Peter Lang : Frankfurt am Main 2017, 91 S.

ISBN: 978-3-631-67548-9