11.01.2018

Mit Pläseer

Plattdüütsch in den Pleeg-Alldag is een vun de groten Themen in uns Tiet. Wiet na vörn lopen sünd de Berufsbillen Scholen in den Landkreis Ollenborg. Se hebbt en eerste Sammlung mit Utdrück un Sätz för de Praxis tohoopstellt, de hebbt se grötter maakt un frisch rutgeven. Un nu gifft dat allens ok för de Ohren.

Dor markt een, dat de Arbeit wiedergeiht. Eerst hebbt se sammelt un tohoopstellt. Denn hebbt se dat in den Ünnerricht utprobeert – un dor denn noch wedder nee’e Saken funnen. Man de jungen Lüüd, de mit keen Woort Platt in de Utbildung ringaht, mööt ok den Moot opbringen, in de „frömde“ Spraak to snacken. Dorför bruukt se en Höör-Indruck. Dat beste is, wenn de vun en Platt-Snacker kummt. Geiht aver ok mit en CD: eenfach in den Rekner oder Player rinleggen – un foorts geiht dat los.

Dat Snacken övernehmt Hella Eineman-Gräbert un Dette Zingler, twee vun de Motoren för Platt in de Pleeg an de BBS Willshusen. Wat se seggt, dat seggt se fründlich-neutral un nich opgereegt. So kann jeedeen dat opnehmen un nasnacken.

Plattdeutsch in der Pflege. Begleitendes Tonmaterial zur Wortschatzbroschüre. Herausgeber: Berufsbildende Schulen des Landkreises Oldenburg. Ansprechpartnerin: Hella Einemann-Gräbert, Postfach 1164, 27793 Wildeshausen. E-Mail: plattdeutsch-pflege@bbswildeshausen.de