04.11.2019

Mit Lasse in de Bickbeeren

Lasse will in’t Holt Bickbeeren un Kroonsbeeren sammeln. Man he kann keen finnen. As he trurig op en Stubben sitt, steiht op Mal de Bickbeervadder vör em. De nimmt em mit in sien Dwargenland. De Bickbeerjungs plückt gau den een Korv bet baven vull. Wat he woll ok so veel Glück hett bi de Kroonsbeerdeerns?

Elsa Beskow ehr Kinnerbook-Klassiker is 1901 in Sweedsch toeerst rutkamen. De Biller, de uns vundaag woll idyllisch vörkaamt, un in de to lesen is, wo fröhlich Natur un Minschenleven tohoopspeelt, kaamt bi dat Format 29,5 x 23 cm allerbest rut. Un wat gifft dat dor allens to sehn un to bekieken!

2018 hett Margit Hansen al “Okes Skifohrt” vun Elsa Beskow op Platt rutgeven. Un nu ”Lasse in’t Bickbeerholt”. Bi’t Schrieven hollt se nich jümmers Kurs: min steiht blangen mien un gaan blangen gahn. Dat Platt, as dat hier opschreven is, kann blots för Schleswig gellen (de Deerns lachten, he bedankde sik).

Elsa Beskow: Lasse in ’t Bickbeerholt. Översett vun Margrit Hansen. Bad Harzburg : Futura Edition 2019, 32 S.

ISBN 978-3-924834-51-7