31.01.2018

Mit Gott sien Woort dör dat Johr

„Gott seggt: Ik will de, de Dörst het, van de Levensborn geven – heel umsünst.“ So steiht dat över dat hele Johr 2018. Un na dat Motto gifft dat för jeedeen Dag en Stück ut dat Ole un een ut dat Nee’e Testament, un mag ween bavento ok noch wat ut christliche Sammelwarken oder Lederböker.

Tohoopstellt hett de „Losungen“, jüst as de beiden Johren vörher ok, Anita Christians-Albrecht. Se hett vör allen tohooparbeit mit Lüüd ut Oostfreesland. Un dor nimmt se ok ehr Schrievwies her. All de Nich-Oostfresen mööt sik dat Platt en beeten trechtbögen. Alltohoop hebbt nich weniger as 50 Theologen mitmaakt.

Dat Book is goot in de Hand to nehmen. Vörn steiht noch en lütt Wöörlist, man anners is dor nich veel Schnickschnack an. Un dat is ok goot so. In dat Book schasst nich veel in lesen – man du schasst dor jeden Dag rinkieken.

Anita Christians-Albrecht (Hrsg.): Losungen 2018 plattdüütsch. Im Auftrag der Arbeitsgemeinschaft Plattdüütsch in de Kark Niedersachsen / Bremen. Burgdorf 2017, 264 S.

ISBN 978-3-9819160-1-0