11.10.2017

Mehr as Radio

Jan Graf speelt op de Bühn. Mit siene Tohörers, mit sien egen Rull. Un he maakt ut siene Lees-Stücken wohrhaftige Speel-Stücken. Vertellen deit he vun dat, wat een in uns Tiet an verdreihten Kraam so allens beleven kann – op de Autobahn, mit Kinner oder bi en Fro, de bi sik dat eerste griese Hoor finnt.

Sien Stimm kennt all, de geern bi „Hör mal en beten to“ toluustert. Siet 2005 is he dor nu al mit bi. Düsse CD aver is mehr as Radio. Denn Graf hett sien ganz persöönlichen Dreih funnen. So vertellt he free vun de Lebber weg, un de Tohörers nehmt em af, dat he vun sik sülvst Bericht gifft, vun sien Familie, siene Naverslüüd, sien Hund.

Jan Graf, tostännig för Plattdüütsch bi NDR 90,3, hett vele Gaven. He is Journalist, Muskant un Entertainer. In all düsse Rullen is he Profi. Un dat wiest he op düsse CD, opnahmen in’n April-Maand 2017 bi en öffentliche Veranstaltung bi de Nedderdüütsche Bühn in Flensborg.

Jan Graf: Allens nich so eenfach, wenn een dat duppelt nimmt. Hamburg : Quickborn-Verlag 2017.

ISBN 978-3-87651-423-9