09.10.2019

Mammut wahnt bi Mia

In’n Zoo hebbt de meisten Deerten dat lütt Mammut argert. Dor is dat weglopen. Nu is dat bi Mia to Huus. Familie Hansen hett dat Deert, dat egentlich gor nich in uns Welt rinhöört, bi sik opnahmen. Kloor, dat dat dor en Barg to beleven gifft – mit Hunnen, mit Naverslüüd un mit anner leidige un unleidige Minschen.

Op Hooch hett Gesine Wanke de Geschicht opschreven. Un Ingrid Straumer is denn bigahn un hett ehr platt maakt. De Biller, in Klöör un in Swatt-Witt, hett Heidrun Schlieker tostüert. Dat Vertellen boot sik över meist hunnert Sieden op un is veel mehr as en lütte Geschicht to’n Inslapen.

Kinner, de de Geschicht sülvst lesen wüllt, mööt woll doch al teihn Johr oder so oolt ween. Man een kann sik so’n Book ja ok heel kommodig vörlesen laten.

Gesine Wanke: Mammut Hansen leevt nich in’n Zoo. Plattdüütsch vun Ingrid Straumer mit Biller vun Heidrun Schlieker. Hamburg : Quickborn-Verlag 2019, 108 S.

ISBN 978-3-87651-469-7