22.02.2018

Luther singen

Dat Luther-Johr is al üm – man Luther siene Choräle kann een ok singen, wenn nich jüst en Jubel-Fier ansteiht. Düt lütt Singbook versammelt 14 Stücken vun Luther, hier all op Platt. To de Texten hett Oliver Rosteck de Gitarrenakkorden schreven un den Notensatz maakt.

De Texten hett de Rutgever Oliver Rosteck vun hier un dor tohoopsöcht. Dor sünd welk mit binnen ut dat Plattdüütsche Gesangbook (Celle), vun Ernst Arfken, Cord Denker, Heinrich Hansen un Theodor Stoltenberg – un wo he keen plattdüütsche Version funnen hett, dor hett Marlene Dullin dat Stück ganz nee in den Hand nahmen.

Vele Luther-Choräle hebbt en Barg Strophen – hier sünd dat meist nich mehr as veer oder fief. Blots bi „Vun’n Himmel hooch“ sünd negen Strophen afdruckt. För Lüüd, de nich allens op Platt verstaht, warrt ünner den Text en poor Wöör verkloort.

Gott blifft dien Kraft. Choralsingbook mit Texten vun Martin Luther in plattdüütsche Riemels. Rutgeven vun Oliver Rosteck. Eres : [Lilienthal 2017], 33 S.

ISBN: 978-3-87204-343-9

ISMN 979-0-2024-2343-1