05.09.2017

Levensdanz

Jürgen Kropp versteiht mit Spraak ümtogahn, mit Klang un mit Bedüden. Düsse Kunst speelt he in sien Gedichtenbook „Glasfiedeltöön“ ut: Geföhlswelten wallt op twüschen Weekwarmdüüstern un Hattkooltdüüstern.

Mehr as dörtig Johr hett Jürgen Kropp Gedichten vun’t Danzen schreven, wedder un wedder. Hett Groth sien Matten anklingen laten, he hett schreven vun’t Sweven un dorvun, woans een sik heel un deel in Klang un Bewegen verleren deit. Wo nu aver mehr un mehr düüster Biller in em opduukt, wo dat Danzpoor ut de Richt löppt, wo keeneen mehr de liesen Töön hören kann, seggt he: Sluss mit Danz! Un hett siene Danz-Stücken in en Book afdruckt.

In dat Danz-Motiv stickt wohrhaftig en Barg an Metaphorik binnen: De Musik – mit Melodie, Rhythmus, Harmonie, Form – drifft twee Partners an, mal tophoop, mal een gegen den annern, mal sachten, mal mit Gewalt. För Dele vun sien Danz-Lyrik hett Jürgen Kropp al den een oder annern Literaturpries kregen.

Dat is fein, dat Kropp den Verlag ut Fischerhuud, de ja al vör 30 Johr gode plattdüütsche Böker maakt hett, vun sien Lyrik övertüügt hett. De lütte Band süht ut, as sik dat för en Gedichtenbook höört, un dat nich blots vunwegen de Biller vun Petra Hempel.

Jürgen Kropp: Glasfiedeltöön. En Danzleven. Verlag Atelier im Bauernhaus : Fischerhude 2017, 59 S. ISBN 978-3-96045-092-4