19.11.2019

Lederschatzkist

Hunnert Leder vun Jan Cornelius in een Book – dat is en grote Freid för all de, de siet 40 Johr düsse Musik in’t Ohr hebbt (un faken nich wedder los warrt). Kinnerwelten, Leevde, Land un Lüüd, de Natur mit Wind un Stroom un de Vögelfeer un bet an’t End vun de Welt – to de Texten gifft dat de Noten un de Akkorden, kloor un düütlich sett: För jeedeen to’n Naspelen.

Jan Cornelius höört to de groten plattdüütschen Lederpoeten. Mal üm mal hett he lütte Spraakbiller maalt, de goden Sieden hett he söcht un de liesen Töön hett he funnen. 19 LPs un CDs hett he, eerst tohoop mit sien Bröder Jürn, denn alleen, rutbröcht. Denn de vele, velen Konzerten. Düt Book nu sett em en Denkmal, as he dat verdeent hett.

De Noten sett hett Gerold Meinen. Gerd Brandt vun ”Laway” is een vun de Rutgevers. De Leder schickt Jan Cornelius noch en lütte Geschicht oder en Gedank achtan – hier en Funk un dor en helen Levensromaan.

Jan Cornelius: Musikgeschichten. 100 Texte des ostfriesischen Liedermachers mit Noten und Akkorden, hrsg. von Gerold Meinen. Neustadtgödens : Atrychoke / Lüneburg : Plattenhauer Verlag 2019, 220 S.

ISBN 978-3-937949-25-3