17.05.2018

Lachen deit goot!

De Mekelnborger Rudolf Tarnow is een vun de plattdüütschen Schrieverslüüd, de an’n meisten vörleest warrt. Dat gellt al siet hunnert Johr. Wiss liggt dat mit doran, dat he för jeedeen Geschicht en passliche Pointe funnen hett, dat he vun Lüüd as Du un ik vertellt hett un för allens plietsche Wohrheiten funnen hett. Un nu also: Twee CDs mit Tarnow to’n Anhören.

De Opnahmen tohoopstellt hett Rainer Schobeß, Platt-Redaktöör bi NDR 1 Radio MV. To hören sünd Gerd Lüpke un Fritz Hollenbeck, Gerd Micheel un Susanne Bliemel un annern mehr. De Leder kaamt vun de Fritz-Reuter-Bühn, Skiffle Schwerin un de Plattfööt. Bi de beiden CDs liggt en lütt Book mit bi – dor kann een wat nalesen över Tarnow sien Leven un över de Texten. Dat allens is gediegen un mit Verstand maakt.

Tarnow – dat is de plattdüütsche Klassiker för de Humor-Literatur. Siene „Burrkäwers“ sünd wedder un wedder verköfft worrn, denn „Köster Klickermann“ un „Rüter-Püter“. 36 Stücken sünd hier to hören, de CDs loopt goot 105 Minuten.

Rudolf Tarnow: Mötst di nich argern. Das große Rudolf Tarnow Hörbuch. Reimschwänke, Lieder, Gedichte und eine Spukgeschichte. Tennemann : Schwerin 2018.

ISBN 978-3-941452-54-1