24.03.2018

Kopp, Schuller, Knee un Fööt

In den Kinnergoorn in Düdenbüttel gifft dat jede Week eenmal Platt. Un dat siet mehr as teihn Johr. In de Hand nahmen hett dat Magda Mügge. In de Mapp, de se nu vörleggt, wiest se de Leder, Spelen un Texten, de för dat een oder anner Thema passlich sünd.

De 21 Stremels boot sik an Themen op: Ik un du, Kledaasch, Speelsaken, buten spelen, eten, inköpen, Klören... Veel löppt mit Rhythmus un Hannenklappen un Riemels: Wat nich ruuch is, dat is glatt. Keen nich hungrig is, de is... Spaaß maakt ok dat Rundspeel „De Keksdoos“. Vun düsse Oort gifft dat 17 Texten un Anregungen.

Op wat kummt dat bi de plattdüütsche Kinnergoornarbeit an? – To allereerst op de Lüüd, de för jümehr Doon brennt. De aver för düsse Opgaav brennen deit, weet nipp un nau: Ik mutt weten, op wat ik dal will, un ik bruuk gode Vörlagen. Vörweg schrifft Magda Mügge: „De Öllern heff ik to de Plattdüütschstünn inloodt un heff jüm in de Lekschoon mit inbunnen. – Ene Erzieherin schull jümmer dorbi ween un wenn ’t geiht, in de ganze Week af un an mol Platt snacken.“

Platt in’n Kinnergoorn. Ut de Praxis – för de Praxis. Themenprogramm für ehrenamtliche Platt-Experten mit 21 Lektionen je 30 – 45 Minuten. Nach einer Idee von Magda Mügge. Hrsg: Vereen „De Plattdüütschen“. 2017.
De Mapp is för Kinnergoorns in’n Landkreis Stood kostenlos.