03.06.2020

Koggen-Vertellen to’n Tohören

Rostock, Hansetiet, 1350: Kaspar is jüst 10 Johr oolt worrn, nu is he Schippsjung un schall op sien eerste Reis op de Kogg “Anna Maria Sophie” mitfohren. Mit an Boord is de Katt Käthe as blinnen Passaschier. Wat gifft dat dor allens to beleven! Lesen deit de Geschicht Susanne Bliemel – siet vele Johren bekannt as Radio-Fro vun den NDR in Mekelborg un Vörpommern. Se is de Verteller, un se övernimmt ok all de velen Rullen vun Minschen un Deerten in dat Historien-Stück.

As Kinnerbook is dat Vertellen al 2013 rutkamen. Klor, dat geiht üm en Beleevnis, man dat geiht ok üm en Stück Hanse-Geschicht: Wat för Woren sünd an Boord? Woneem fohrt dat Schipp hen? Un denn sünd dor ja ok noch de Liekedeler. Dat allens will Stephan Bliemel, de sik dat Vertellen utdacht hett, goot verpackt an de jungen Minschen ranbringen.

An de Geschicht warrt all de jungen Plattsnackers in Mekelborg un all de, de dor nu Platt lehrt, jümehr Pläseer an hebben.

 

Susanne und Stephan Bliemel: Kaspar un de Klabauterkatt. Gelesen von Susanne Bliemel. Hinstorff-Verlag : Rostock 2020, 59:38 Min.

ISBN 978-3-356-02295-7