18.12.2019

Klenner mit Sagen un Märken

In de Geschichten, de vun en Landstreek vertellt warrt, köönt wi veel aflesen vun dat, wat de Mentalität vun de Minschen dor utmaken deit. „De plattdüütsch Klenner up dat Jahr 2020“ sett de Geschichten in de Natuur un de Landschaft rin un wiest, woneem wi vundaag noch Sporen finnt: De Moorkuhlenbarg in de Dammer Barg, dat Pestruper Gräberfeld oder de Neeborger Urwald.

Vun Januar bet Dezember (oder hier: Vun den Sneemaand bet hen na den Christmaand) gifft dat för jeden Maand 12 Sieden: toeerst en Överblick un Narichten to dat magische Stück Land. Denn dat Kalendarium Week för Week. För meist jeden Dag steiht dor en Henwies: Vun den internatschonalen Dag för Gerechtigkeit  bet hen na den Dag för gesundet Eten. Oder dat gifft Henwiesen op Veranstaltungen oder Minschen, de an den Dag op de Welt kamen oder storven sünd.

Dorto gifft dat Geschichten un Gedichten vun üm un bi 30 Schrieverslüüd. De meisten ut dat Ollenborger Land, man dat een oder anner Stück is vun en anner plattdüütsche Kant. De bunten Biller maakt den Klenner lebennig. Un ok en Reeg vun de Anzeigen wiest sik op Platt. Rutgeven hebbt den Klenner de Spieker un de Ollenborgsche Landschaft. De Redakschoon harrn Rita Kropp un Stefan Meyer.

De plattdüütsch Klenner up dat Jahr 2020. Isensee Verlag : Oldenburg 2019. ISBN 978-3-7308-1592-2