25.04.2018

Johrbook för Literatur

Dat is nu al de 60. Band vun dat Johrbook vun de Klaus-Groth-Gesellschaft (bet vör teihn Johr hett dat noch „Jahresgabe“ heten). Acht Opsätz staht dor binnen – veel hett mit Groth to doon, man dat geiht ok üm Platt bi Twitter oder Platt bi de Utbildung vun Schoolmesters.

Vör een Johr hett Robert Langhanke dat Johrbook as Rutgever övernahmen. An Bidrääg fehlt em dat wiss nich. Un so hett de Utgaav 2018 een Drüddel mehr Sieden. Un dat Nalesen lohnt. Dieter Lohmeier schrifft över de Breven, de Groth mit Stockhausen wesselt hett. Barbara Scheuermann kickt sik an, wat för Texten vun Reuter un Groth in Leesböker un Anthologien ut jümehr Tiet binnenstaht. Ut uns Tiet gifft Alexander Radloff Bericht: Wat döggt Plattdüütsch in de School?

An’t End gifft ok noch en beten plattdüütsche Lyrik ut uns Tiet. Dor steiht för jeden wat binnen, de en Hart hett för Groth, för Literatur oder för Plattdüütsch. An’n 28. un 29. April fiert de Klaus-Groth-Gesellschaft düt Johr ehr Johrsversammeln.

Jahrbuch 2018 der Klaus-Groth-Gesellschaft. Band 60. Im Auftrag der Klaus-Groth-Gesellschaft hrsg. von Robert Langhanke in Verbindung mit Dieter Lohmeier und Bernd Rachuth. Boyens : Heide 2018, 263 S.