12.09.2018

Johr för Johr

De Bevensen-Dagfohrt is nu al 70 Johr lang en Marktplatz för plattdüütsche Literatur un Kultur. Düt Johr kaamt Schrieverslüüd, Medienlüüd un Wetenschaftlers vun den 14. bet to den 16. September in de Lümborger Heid tohoop. Rutkamen is dat Heft, in dat allens binnensteiht, wat 2017 op de Dagfohrt lopen is.

Passlich to dat Luther-Jubel-Johr 2017 weer to Vördrag vun Ingrid Schröder, de een nu noch mal nalesen kann: „Die Reformation und ihre Folgen für die norddeutsche Sprachgeschichte“. Dat in Bevensen aver ok vele nee’e plattdüütsche Geschichten leest warrt, dat wiest de velen Stücken, de hier afdruckt sünd. Dat sik dat Snacken un dat Strieden över plattdüütsche Böker lohnt, dat wiest dat Literartische Kleeblatt – ok wenn dor geern an de een oder anner Steed geern noch en beten mehr Wumm achter ween kunn.

Un denn de Hans-Henning-Holm-Pries. Utgeven warrt de all dree Johr för dat plattdüütsche Höörspeel. Kregen (un wiss ok verdeent) hett den Pries 2017 Heinke Hannig för „Summernacht“, en Stück över Flüchtlinge, dat aver woll nich in’t Radio lopen warrt. Schaad, denn wat Bolko Bullerdiek in sien Loffreed to vertellen hett, dat lohnt. Un ok, wat de Schrieversch sülvst to ehr Höörspeel seggt.

Bevensen-Jahrbuch. 70. Bevensen-Tagung 2017. Bad Bevensen 2018, 152 S.