12.10.2018

Huus ahn Licht

Vun dat Leven un Denken vun plattdüütsche Schrieverslüüd kriegt wi normal nich veel to lesen – dat is bi Fritz Gerhard Lottmann nu anners. Bekannt is he för sien Romaan „Dat Hus sünner Lücht“, den he in den eersten Weltkrieg opschreven hett un de 1919 rutkamen is.

Dat Leven vun Lottmann navertellt hett Hergen Kicker, en Grootenkel vun den Schriever. Mit Breven un Fotos vertellt he vun de eersten Johren in Emm, vun de Lehrtiet as Landmeter, vun de Leevde un vun dat Schrieven in Hooch un Platt. Wat dorbi opsteiht, is en Minsch mit sien Wünschen un Hoffen, sien Denken un Föhlen. Lottmann weer 37, as he 1918 doot bleven is – as he jüst op’n Weg weer, sik as Literaat en Naam to maken.

Hergen Kicker wiest uns en Mann, de eben nich typisch weer för de Tiet üm 1900: He wull wat lehren, glööv an dat Gode in all Minschen un holl wenig vun’t Militär. Un doch blifft Lottmann en Kind vun sien Tiet. Dat hett ok de Utstellung wiest, de de Biograf in’n Sommer 2018 an de Lannsbibliothek Ollenborg wiest hett.

Hergen Kicker: Fritz Gerhard Lottmann. Heimatdichter. Humorist. Humanist. Hamburg: tredition 2018, 324 S.

ISBN Paperpack: 978-3-7439-8040-2
ISBN Hardcover: 978-3-7439-8041-9
ISBN E-Book: 978-3-7439-8042-6