03.04.2019

Groth jubelt

Klaus Groth harr sik wiss dorto freit, to all den Rummel üm sien 200. Geburtsdag. Dat Heft stellt em eerstmal vör: Leven un Wark, un dor höört ok sien Platz in de Literatur mit to. Denn: Wat so allens löppt in dat Groth-Johr 2019. Un an’t Enn: Klaus Groth in uns Tiet. Wat maakt de Literatur-Gesellschap? Wat dat Groth-Museum, wat de Groth-Forschung? Wat för Groth-Böker sünd op den Markt? Allens en beten na de Oort vun Ulf Bichel sien Bild-Biografie ut dat Johr 1994.

De meisten korten Texten hett Robert Langhanke schreven, de Vörsitter vun de Klaus-Groth-Gesellschap. Wat opfallt: Meist all Veranstaltungen sünd in Schleswig-Holsteen – gellt Groth annerwegens gor nix mehr? Lesungen gifft dat, en beten Musik (Brahms), Comics un en Barg Vördrääg. Allens teemlich so as jümmers, meist kene Wedderhaken: Wat is mit de internatschonale Sicht op Groth? Wat is mit de nee’en Medien?

Dat Heft wiest, woneem Groth steiht in uns Welt. Kloor warrt: De Spagat twüschen dat 19. un dat 21. Johrhunnert is bi düssen Dichter nich jümmers licht. Mag ween un düsse Weg warrt eenfacher för de Groth-Gesellschap, wenn dat Jubel-Johr to Enn is un een düütlicher rutkennen kann, wat ünner den Streek nablifft.

 

Klaus Groth. Jubiläumsmagazin zum 200. Geburtstag. Hrsg. v. d. Klaus-Groth-Gesellschaft. Redaktion: Robert Langhanke, Bernd Rachuth, Werner Siems. Gestaltung: Bjarne Ehlers. Heide : Boyens Buchverlag 2019, 62 S.