11.07.2019

Groth geiht comic

Dat comic-center-kiel, dat purefruit-magazin ut Kiel un dat Klaus-Groth-Museum in Heid hebbt sik tohoopdaan – an’t Enn hebbt 29 Comic-Teekners ut ganz Düütschland mitmaakt. Aflevert hebbt se Billergeschichten to Gedichten, Strophen oder Lyrikhappen vun Klaus Groth. Denn he is düt Johr 200 Johr oolt worrn.

Mit Klöör un in Swatt-Witt. As Foto-Collage, realistisch un afstrakt. En beten grulichen Gespensterkraam, denn wedder Kinnerbiller. Vun den klassischen Comic bet hen na Graphic Novel is allens wat dorbi. Jeedeen vun de Teekners hett sien egen Togang funnen. Oder ok nich. As Selina Gurny, de mit Groth sien Froensbild nix anfangen kann.

Dat Heft köst nix. Druckt hebbt se dor 10.000 Stück vun. Lohnen wörr dat för wiss, wenn een vun de Teekners Biller för en ne’e Utgaav vun den Quickborn levern wörr.

 

Hell int Finster. Zum 200. Geburtstag von Klaus Groth. Berlin : Jaja Verlag 2019, 63 S.

Dat Heft kann een bestellen bi dat Klaus-Groth-Museum: museumsinsel@stadt-heide.de

ISBN 978-3-946642-78-7