08.02.2018

Groth ganz groot

Dat is nu al de twete CD vun „Gerths Bagaasch“ mit Leder vun Klaus-Groth op. Düt mal mit 13 Groth-Stücken, mal Blues, mal Rock, mal Pop. Bavento gifft dat en Leed, dat op en Text vun Edgar Allan Poe trüchgeiht. För’t Singen trechtmaakt hett de Texten Gerth Schmidt, de ok de Musik arrangeert hett.

Gerths Bagaasch – dat sünd nu söven Mannslüüd, all tohoop ut Bremerhaven un umto un all tohoop mit veel Musik in’t Bloot. To de Gäng mit Nils Wandrey, Ingo Beck, Lars Hierath un Gerth Schmidt sünd nee dortokamen: Olaf Satzer (Trummeln), Stephan Hübler (Bass un Piano) un Dario Beck (Gitarr un Ukulele).

Dat Markenteken is de snarren Stimm vun Gerth Schmidt. Mit de nee’en Muskanten is de Klang vuller worrn, „Gerths Bagaasch“ hett en Barg mehr Mööglichkeiten. Un de speelt se ok ut.

Gerths Bagaasch: Grothe Tieden. Kannst bestellen bi: www.gerthsbagaasch.de.