22.12.2017

Geest, Masch un Moor

He kennt siene Lüüd. Un he kennt sik ut in dat Land twüschen Elv un Weser. Namen as Findorff un Brockes hebbt düt Land jüst so ehren Stempel opdrückt as Jan Rurarz, den de Twete Weltkrieg ut Polen na hier spöölt harr – un de hier bleven is.

Schoolmester is Hans-Hinrich-Kahrs. Un he verstickt dat ok gor nich eerst. Wenn he vun den Kummer vertellt, den junge Lüüd hebbt, denn nimmt he dat eernst. Un wi Lesers ahnt, dat he de Geschichten vun dat Leven afschreven hett. To dat Dörpsleven höört ok wat to’n Högen un ok, wo een mit den annern ümgeiht. Hier wiest Kahrs sien Kraft: He kickt sik sien Lüüd nipp un nau an, un he geiht jüm nich an de Plünnen, wenn he vun jüm schrifft.

Dat he mehr kann as Dialogen schrieven – bet nu sünd Theaterstücken, Sketch-Sammlungen un teihn Höörspelen vun em rutkamen –, dat wiest Hans-Hinrich Kahrs mit düt Book. En Book, dat villicht mehr vertellt över sien Gegend as en buten Bildband.

Hans-Hinrich Kahrs: Dor liggt dat gröne, platte Land. Geschichten un annerswat ut dat Land twüschen Elv un Weser. Stade : Landschaftsverband der ehemaligen Herzogtümer Bremen und Verden 2017, 143 S.

ISBN 978-3-931879-69-3