15.11.2018

Geern wedder leest

Siene eersten Böker hett he vör 35 Johr verköfft – nu is Gerd Spiekermann op Rente, he hett Tiet to’n Schrieven, man nu kummt eerst mal en Book mit siene bekanntesten Vertellen rut. Bavenan steiht sien Klassiker „Oma ehr Schötteldook“, de lange Tiet gor nich mehr op den Markt weer. Un dorto denn noch 40 anner Geschichten ut 8 Böker.

Gerd Spiekermann kann vertellen as man een. Un dat helpt, wenn een bi’t Lesen sien Stimm in’t Ohr hett. Vun wat he vertellt? Vun uns Leven – nich so, as dat is, man so, as dat ween kunn. Vun uns Leven mit all de lütten Geschichten üm Mama, Oma, Unkel Johnny oder Fründ Dieter. Vun uns Leven twüschen Souvenirs, Brausepulver, Goulaschkrüter un Klassentreffen.

Spiekermann hett sik siene Lüüd nipp un nau ankeken. He kennt jüm un he mag jüm. Un he vertellt so, dat de Tohörers un Lesers den Indruck nich loswarrt, dat he vun jüm un jümehr Leven vertellt.

Gerd Spiekermann: Oma ehr Schötteldook. Hamburg : Quickborn Verlag 2018, 116 S.

ISBN: 978-3-87651-452-9