14.12.2017

Geehrter Herr Direktor, theurer Freund

16 Breven, de Alwine Wuthenow twüschen 1878 un 1904 an Johann Meyer schreven hett, sünd hier natolesen. Vör en poor Johr harr man de in de Universitätsbibliothek Griepswold opfunnen. Nu hett Eberhard Schmidt jüm as Book rutgeven.

Alwine Wuthenow is een vun de wenigen Froenslüüd, de sik ganz fröh al vun Klaus Groth un Fritz Reuter hebbt ansteken laten. 1857 is ehr Lyrikband „En poa Blomen ut Annmariek Schulten Goahrn“ rutkamen, 1861 denn „Nige Blomen“. De Brevenschrieverin vertellt vun ehr Familie, veel vun Krankween, Kummer un Starven, man wi leest meist nix doröver, wat för ehr Schrieven bedüden deit, wat Poesie utmaakt oder wo för ehr Plattdüütsch un Literatur tohoopgeiht.

Johann Meyer weer in’t letzte Viddel vun’t 19. Johrhunnert een vun de plattdüütschen Schrieverslüüd, de veel afdruckt un leest worrn sünd: en Gelegenheitsdichter, de gefällig riemeln kunn. Alwine Wuthenow hett düssen wichtigen Mann verehrt, un so hett de een den annern jümmers wedder Gedichten tostüert, de mit afdruckt sünd.

Twüschendör fehlt ok mal Breven, man de kaamt woll ok nich mehr vör Dag, jüst so as de Gegenbreven vun Meyer. De Rutgever hett en Personregister anleggt, he druckt en Billeranhang af un gifft Naricht vun dat Leven vun Meyer un Wuthenow.

Alwine Wuthenow: Briefe an Johann Meyer. Hrsg. Von Eberhard Schmidt. Vertrieb: BS-Verlag : Rostock 2017, 91 S. (+ 51 S. unpaginiert)
ISBN 978-386785-425-2